ព្រះសីហនុ៖ ពលរដ្ឋ១៣គ្រួសារ បានស្ម័គ្រចិត្តរុះរើខ្ទមដែលសង់អាណាធិបតេយ្យនៅលើដីកម្មសិទ្ធិឯកជនក្នុងភូមិ៤ សង្កាត់លេខ៤ ក្រុង និងខេត្តព្រះសីហនុ ក្រោយពីអាជ្ញាធរក្រុងព្រះសីហនុបានណែនាំជាលើកទី២នៅថ្ងៃទី១៤ ខែមីនា ឆ្នាំ២០២៣។
នាយកទីចាត់ការអន្តរវិស័យសាលាខេត្តព្រះសីហនុ លោក ប៊ូ វឌ្ឍនា បានបញ្ជាក់ថា អាជ្ញាធរបានអន្តរាគមន៍លើករណីនេះក្រោយពីម្ចាស់ទីតាំងដីនោះ បានដាក់សំណើទៅរដ្ឋបាលក្រុងដើម្បីសាងសង់របងព្រំដី ប៉ុន្តែត្រូវបានប្រជាពលរដ្ឋរស់នៅអាណាធិបតេយ្យលើដីនោះរារាំង។
ពលរដ្ឋទាំងនោះមិនព្រមចាកចេញពីទីតាំងនោះ ទាល់តែម្ចាស់ដីផ្តល់សំណងទើបព្រមចាកចេញ។ លុះដល់ថ្ងៃទី២២ ខែកុម្ភៈ ឆ្នាំ២០២៣ អាជ្ញាធរក្រុងព្រះសីហនុបានមកចុះណែនាំ និងស្នើឱ្យពលរដ្ឋរុះរើសំណង់ដែលខ្លួនសង់នោះចេញក្នុងរយៈពេល១សប្តាហ៍។ ដល់ថ្ងៃកំណត់ ពលរដ្ឋនៅតែមិនទាន់រុះរើចេញ ទើបក្រុមការងាររដ្ឋបាលខេត្តបានចុះទៅអប់រំម្តងទៀតនៅថ្ងៃទី១៤ ខែមីនា ឆ្នាំ២០២៣។
គិតមកដល់ថ្ងៃពុធ ទី១៥នេះពលរដ្ឋទាំង១៣គ្រួសារនោះបានរុះរើខ្ទមអាណាធិបតេយ្យនោះចេញអស់ហើយ៕
